होळी आणि धुलिवंदनासाठी राज्य सरकारनं नवी नियमावली जारी केली आहे. त्यानुसार, रात्री दहाच्या आत होळी पेटवणं बंधनकारक आहे, डीजे लावायला मनाई केली आहे. होळी साजरी करताना मद्यपान आणि बीभत्स वर्तन करणाऱ्यांविरुद्ध कारवाई केली जाईल, असं गृह मंत्रालनं म्हटलं आहे. कोविडचा प्रादुर्भाव अजूनही असल्यानं मास्कचा वापर, सामाजिक अंतराचा नियम पाळणं गरजेचं आहे. राज्यात सध्या इयत्ता दहावी आणि बारावीच्या परीक्षा असल्यानं ध्वनीवर्धक लावू नये, अशा सूचना दिल्या आहेत.

कोरोना प्रतिबंधक लसीच्या वर्धक मात्रेनंतर आरोग्य आणि अत्यावश्यक सेवेतल्या कर्मचाऱ्यांमध्ये किती प्रमाणात प्रतिपिंडं तयार झाली, आणि ही प्रतिपिंड किती काळ टिकणार याचा आढावा घेण्यासाठी मुंबई महानगर पालिका सहावं सेरो सर्वेक्षण करणार आहे, अशी माहिता पालिकेचे अतिरिक्त आयुक्त सुरेश काकाणी यांनी दिली. 

९ महिने इतक्या मोठ्या कालावधी पर्यंत हे सर्वेक्षण चालणार आहे. हे सर्वेक्षण तीन टप्प्यात केलं जाणार आहे.कोरोनाच्या तीसऱ्या लाटेच्या पार्श्वभूमीवर या कर्मचाऱ्यांच पूर्ण लसीकरण करण्यात आलं. मात्र मोठ्या कालावधी नंतर या कर्मचाऱ्यांची प्रतिपिंड कमी झाल्यामुळे या कर्मचाऱ्यांना आणि ज्येष्ठ नागरिकांना वर्धक मात्रा देण्यात आली होती.

कोरोनाची तीसरी लाट ओसरत असतान कोरोनाची संभाव्य चौथी लाट पुन्हा येण्याचे संकेत दिले जात आहेत. त्यामुळे वर्धक मात्रेनंतर हे कर्मचारी चौथ्या लाटेचा सामना करण्यासाठी पुरेसे सक्षम आहेत का, की त्यांना आणखी वर्धक मात्रा देण्याची गरज आहे, याचा अभ्यास पालिका करणार आहे. 

राज्यात कोविड १९ च्या उपचाराधीन रुग्णांची संख्या २ हजाराच्या खाली आली असून, रुग्ण बरे होण्याचं प्रमाण ९८ पूर्णांक १ दशांश टक्के झालं आहे. राज्यात आज २३७ नव्या रुग्णांची नोंद झाली. ४५५ रुग्णांनी कोरोनावर मात केली, तर २ रुग्णांचा मृत्यू झाला.

राज्यात आतापर्यंत एकूण ७८ लाख ७१ हजार ८०३ जणांना कोरोनाची लागण झाली. त्यापैकी आतापर्यंत ७७ लाख २१ हजार ९६५ रुग्ण बरे झाले, तर १ लाख ४३ हजार ७५९ रुग्ण दगावले. राज्यातला मृत्यूदर १ पूर्णांक ८२ शतांश टक्के आहे. सध्या राज्यात २ हजार ७५ रुग्णांवर उपचार सुरु आहेत

 

 

 

Source and credit: AIR News